【2019白居二懶人包】白居二借足9成上車　全港20年樓齡以下年輕二手居屋 一文睇哂

各準新人除了要忙著籌備婚禮各事項外，婚後嘅住屋問題亦係一大煩惱。喺香港呢個樓價高企嘅地方置業，參加新居屋及白居二大抽獎係比較容易上車嘅途徑。「白表居屋第二市場計劃2019」已於2019年8月15日早上10點進行咗攪珠儀式，首10個號碼分別係98、06、60、29、57、33、65、63、28、90。今年白居二2019共有3,000個配額，2人或以上的家庭組合共有2,700個，而單身申請者則有300個。白居二2019收獲13萬份申請，據去年的經驗，單身申請者佔近6成，估計約有7.8萬份單身申請。每個攪珠號碼約有1,300個申請者，換言之家庭申請者要抽中首5個號碼才「穩中」，而單身申請者即使抽中首個號碼，亦要2.6人爭1個配額。

中籤的幸運兒需在7個工作天內提供證明文件，進行詳細資格審查。成功申請人士會獲發2封批准信，一封適用於房委會的居屋第二市場，另一封則用於房協「住宅發售計劃」的第二市場。持信人可於批准信發出日期起計2星期內，向房委會／房協申領「購買資格證明書」（每張證書收費HK$770，有效期為1年），於1年內購買居屋第二市場未補地價的單位。在購買二手居屋時，根據上篇文章 【2019白居二懶人包】抽中白居二？申請二手居屋按揭需知及按揭小貼士，按揭批核最重要嘅係視乎政府擔保期，即係要留意二手居屋嘅樓齡。為咗獲批最高9成按揭及長還款期，最好就係選擇樓齡較新及售價低於400萬嘅二手居屋。LOVEWEDPIN 摯愛婚享 小編為大家整合咗全港樓齡20年以下嘅二手居屋，附上最新叫價，讓各位準買家喺籌備首期時有心理準備，免失預算。

年輕居屋佔市場比率少於4分1

全港共有181個可供在居屋第二市場購買嘅居屋屋苑，當中只有45個屋苑嘅樓齡係20年或以下，即代表可承造高成數按揭及長還款期嘅屋苑少於4分1，而當中叫價低於400萬嘅單位又少之有少。大家亦要留意，售價400萬元以下嘅單位最多借九成，400萬至450萬的單位最多借360萬，450萬至600萬的單位最多借八成。各位準買家如抽中白居二，亦要準備充足首期，免得到時按揭貸款不足以至撻訂。上車客必須留意，二手居屋過咗30年政府擔保期，銀行批核按揭標準會100%轉變，首先係按揭成數會由最多9成，跌至最多6成；其次係須提交入息證明及通過壓力測試。

沙田區擁最多白居二單位

沙田區擁有最多白居二屋苑及單位，共有23個屋苑及超過46000個單位，屬全港之冠，分佈喺馬鞍山、沙田及大圍，但能承造高成數按揭及25年還款期嘅屋苑只有3個，係位於馬鞍山嘅錦泰苑、沙田愉翠苑及大圍嘉徑苑。全部屋苑叫價均超過500萬，最平叫價及呎價最低嘅屋苑係馬鞍山錦泰苑，叫價$530萬，實用面積506呎，呎價$10,474。如銀行能承造最高8成按揭及提供25年還款期，買家須準備106萬首期，月供約$18700。

市區中黃大仙區選擇最多

而喺市區中，黃大仙區擁有最多白居二屋苑，共有22個，分佈喺竹園、鑽石山、慈雲山、橫頭磡、斧山、牛池灣、樂富、黃大仙、中九龍及彩虹，但樓齡少於20年嘅屋苑只有8個，分別係采頤花園、宏景花園、瓊軒苑、康強苑、德強苑、慈愛苑、嘉峰臺及盈福苑。全部屋苑嘅叫價均超過400萬，最平叫價及呎價最低嘅屋苑係慈雲山慈愛苑，叫價$450萬，實用面積401呎，呎價$11,222。如銀行能借足360萬及提供25年還款期，即買家須準備90萬首期，月供約$15900。不過要留意慈愛苑有部分樓宇是97年落成，超過咗20年嘅界線，購買前須了解清楚該單位嘅首次出售年份。

港島區東區最平

至於港島區最多白居二屋苑嘅係東區，共有21個，樓齡20年以下嘅有5個，係位於柴灣嘅悅翠苑，筲箕灣嘅愛蝶灣、東盛苑、東濤苑及東旭苑。叫價最平嘅屋苑係筲箕灣東盛苑，叫價$499萬，實用面積406呎，呎價$12,291。如銀行能承造最高8成按揭及25年還款期，買家則須準備99.8萬首期，月供約$17600。而呎價最低嘅屋苑係柴灣悅翠苑，叫價$560萬，實用面積559呎，呎價$10,018。如銀行能承造最高8成按揭及提供25年還款期，買家須準備112萬首期，月供約$19800。

全港最平白居二屋苑　借足9成

叫價最平嘅白居二屋苑位於元朗區，該區共有7個白居二屋苑，當中樓齡少於20年嘅屋苑有4個，分別係天水圍天頌苑、天富苑、天盛苑及元朗鳳庭苑。該區較多單位叫價係400萬或以下，換句話說係可以承造9成按揭及25年還款期。叫價最平嘅屋苑係天水圍天頌苑，叫價$370萬，實用面積429呎，呎價$8,625。如銀行能承造最高9成按揭及提供25年還款期，買家只需準備37萬首期，月供約$14700。

市區最平居屋　呎價不足$11000

至於市區中叫價最平嘅白居二屋苑位於將軍澳，該區共有18個白居二屋苑，當中樓齡少於20年嘅屋苑有4個，分別係和明苑、唐明苑、彩明苑及寶盈花園。全部屋苑嘅叫價均超過400萬，最平叫價及呎價最低嘅屋苑係和明苑，叫價$450萬，實用面積433呎，呎價$10,393。如銀行能借足360萬及提供25年還款期，買家須準備90萬首期，月供約$15900。

小編整合咗現時樓齡少於20年嘅白居二屋苑，附上最新叫價，售價只供參考：